Структура на АД ЕЛЕМ

СТРУКТУРА НА АД ЕЛЕМ

Термоелектрани

Термоелектраните се приоритетни во електроенергетскиот систем на Македонија. Тие покриваат 81% од производството на електрична енергија во АД ЕЛЕМ. Најголем термо-капацитет е РЕК Битола со своите три блока Битола 1, 2 и 3, со нето просечно годишно производство од 4.400 GWh. Јагленот е основно гориво во РЕК Битола. Во составот на термо системот во Република Македонија припаѓа и РЕК Осломеј со инсталирана моќност на блокот од 125 MW и нето просечно годишно производство од 500 GWh. Јагленот е основно гориво и во РЕК Осломеј.

 

Термоелектрани	Инсталирана моќност MW	Нето производство GWh	Година на пуштање	Работни часови h	Основно гориво	Енергетска вредност на гориво kJ/kg
Битола 1	233	851,1	1982	555:06:00	Јаглен	6353
Битола 2	233	1.207,6	1984	7809:43:00	Јаглен	6353
Битола 3	233	1.258,2	1988	7657:49:00	Јаглен	6353
Осломеј	125	189,6	1980	2588:44:00	Јаглен	5925
ВКУПНО	824	3.506,4

 

 

Хидроелектрани

Вкупната инсталирана моќност на хидрокапацитетите изнесува 553,6 MW, односно 40% од вкупните капацитети на АД ЕЛЕМ. Во АД ЕЛЕМ постојат осум хидроелектрани, од кои две проточни, Равен и Врбен и шест акумулациони, Вруток, Шпилје, Глобочица, Тиквеш, Козјак и Света Петка. Од вкупното производство на електрична енергија во АД ЕЛЕМ, од хидропроизводство се обезбедува околу 19%, и тоа пред се за задоволување на дневните варијации на потрошувачката на електрична енергија и за обезбедување на системските услуги за регулација со што се постигнува поголема флексибилност и распoложливост на електроенергетскиот систем.

 

Хидроелектрани	Број на агрегати	Инсталирана моќност MW	Нето производство GWh	Работни часови h	Година на пуштање	Тип на електрана
Вруток	1 2 3 4	41,4 41,4 41,4 41,4	325,75	2083,1 2419,6 2384,2 2376,8	1957/1973	Акумулациона
Равен	1 2 3	6,4 6,4 6,4	37,89	2805,9 2161,5 3160,7	1959/1973	Проточна
Врбен	1 2	6,4 6,4	34,40	3631,3 4707,3	1959	Проточна
Шпилје	1 2 3	28 28 28	190,26	2952,8 2916,7 2972,4	1969	Акумулациона
Гловочица	1 2	21 21	136,21	3602,8 3657,4	1965	Акумулациона
Тиквеш	1 2 3 4	28,5 28,5 28,5 28,5	116,06	1303,0 1170,0 1377,0 1423,0	1968/1981	Акумулациона
Козјак	1 2	40 40	80,43	1039,6 1246,1	2004	Акумулациона
Света Петка	1 2	18 18	37,19	1166,4 1121,4	2012	Акумулациона
ВКУПНО	44	553,6	958,19	5167,93

 

Ветерни електрани

Во февруари 2014 година заврши изградбата на паркот на ветерни електрани „Богданци“, прв ваков објект во Република Македонија, што ќе го користи ветерот како погонска сила за производство на електрична енергија. Подигнувањето и монтажата на ветерниците на локацијата Ранавец во општина Богданци заврши на 20 февруари со што и официјално е заокружена најтешката фаза од изградбата која траеше 76 дена.

Кон крајот на март 2014 година беше спроведена координирана операција на трите енергетски компании ЕЛЕМ, МЕПСО И ЕВН за приклучување на ветерниот парк на електропреносната мрежа преку трафостаницата во Валандово. Со тој зафат се создадоа потребните предуслови да започне тестирањето на комплетната опрема преку пробно производство на електрична енергија што почна на почетокот на април кога беа испорачани и првите киловат-часови кон електроенергетскиот систем на Република Македонија.

 

ВЕТРО ЕЛЕКТРИЧНИ ЦЕНТРАЛИ	Број на агрегати	Инсталирана моќност MW	Нето производство GWh	Година на пуштање
ПВЕ Богданци	16	36,8	70,4	2014

 

Турбините се производство на Сименс - Данска и се вбројуваат меѓу најдобрите во својата класа. Инсталираната моќност на секоја од нив е 2.3 MW, висината на столбот изнесува 80 метри, а дијаметарот на елисата изнесува 93 метри. ПВЕ „Богданци“ се очекува годишно да испорачуваат најмалку 100 GWh природно одржлива енергија. Истовремено тие ќе ја зголемат инсталирана моќност на АД ЕЛЕМ за 36,8 MW. Со овој проект ќе се зголеми и учеството на обновливите извори во АД ЕЛЕМ, што претставува уште еден показател за грижата на компанијата кон животната средина.